AULA DE TEATRO DO CAMPUS DE OURENSE. UVIGO. GRUPO CORDELIA - SHOOT

Estanvos bombardeando, os edificios caen. Un castelo, un parque no centro da cidade, un tren, o teatro...todo. E nós estamos aí. Mirando, mirándovos. Mirando as imaxes unha e outra vez. Esas pobres imaxes.
Hai poucas cámaras para gravar todo o que sufrides. Unha e outra vez as mesmas imaxes, pero nunca é suficiente.
Bombardéanvos. É un horror. Cando vemos -as noticias- arrepíannos. Pola mañá dúchome, exfolíome con esmero, fago zume e poño as noticias un momento, e aí está.
Bos e malos, occidente e oriente, democracia e ditadura, guerra e paz.
Mark Ravenhill, do que botamos man xunto con Arístides Vargas, reflexiona sobre esta cuestión e proponnos un xogo de espellos nos que recoñecernos desde o xenuíno, pero tamén desde a hipocrisía.